2025 жылдың басынан бері 2 185 этникалық қазақ тарихи отанымен табысып, қандас мәртебесін алды. Жалпы, 1991 жылдан бері Қазақстанға 1 млн 150 мыңнан астам этникалық қазақ оралды, деп хабарлайды Altainews.kz тілшісі Еңбек және халықты әлеуметтік қорғау министрлігіне сілтеме жасап.

Жыл басынан бері Қазақстанға келген қандастардың ішінде:

• 46,4%-ы – Қытайдан,
• 41%-ы – Өзбекстаннан,
• 7,1%-ы – Түрікменстаннан,
• 1,9%-ы – Ресейден,
• 1,6%-ы – Моңғолиядан,
• 2%-ы – басқа елдерден.

Қандастардың көбі республиканың әртүрлі өңірлеріне қоныстанды. Мемлекет еңбек күші тапшы аймақтарға көшуді ынталандыру мақсатында арнайы өңірлерді белгіледі. Оларға:

• Ақмола,
• Абай,
• Қостанай,
• Павлодар,
• Атырау,
• Батыс Қазақстан,
• Шығыс Қазақстан,
• Солтүстік Қазақстан облыстары жатады.

Бұл өңірлерде қандастарға мемлекеттік қолдау шаралары қарастырылған. 2025 жылға арналған қандастарды қабылдау квотасы – 2 309 адам. 1 наурыздағы жағдай бойынша 389 қандас осы аймақтарға қоныстанды.

Қандастарға қандай көмек көрсетіледі?
Қоныс аударған қандастарға мынадай қолдау шаралары ұсынылады:

1. Көшуге арналған бір реттік субсидия: отбасы басшысына және әрбір мүшесіне – 70 АЕК (275,2 мың теңге);
2. Бір жыл бойы тұрғын үй жалдауға және коммуналдық қызметтерге төлем: 15-тен 30 АЕК (59-дан 118 мың теңгеге дейін).
3. 2025 жылдың басынан бері 84 қандасқа түрлі қолдау шаралары көрсетілді, олардың ішінде 56 адам тұрақты жұмысқа орналастырылды.

Ерікті қоныс аударуды тиімді ұйымдастыру үшін жұмыс берушілерді қолдау тетігі енгізілді. Қандастарға экономикалық ұтқырлық сертификаты беріледі, ол тұрғын үй сатып алу, салу немесе ипотека бойынша бастапқы жарнаны төлеу үшін қолданылады. Оның мөлшері – үй құнының 50%-ы немесе 4,56 млн теңгеге дейін.