Алтайлық жас патриоттар ант берді
Алтай қаласындағы С.Нұрмағамбетов атындағы орта мектебінде әскери-патриоттық тәрбиеге бағытталған «Жас сарбаз» сыныбы дәстүрлі түрде жаңа мүшелерді қабылдады. Салтанатты шара барысында оқушылар өз елінің патриоты болуға ат берді, деп хабарлайды Altainews.kz тілшісі.
«Жас сарбаз» сыныбының тәрбиеленушілері халықаралық және облыстық деңгейдегі түрлі жарыстарға белсене қатысып келеді. Олар 2016 жылдан бері «Жас ұлан» сайысының тұрақты чемпиондары болып, «Айбын» жарысында үш рет жеңімпаз атанды. Сонымен қатар, 25 оқушы қол күресінен спорт шебері атағына үміткер болып, облыстық әскери жарыстардың жеңімпаздары мен жүлдегерлері қатарынан орын алды.
– Сыныптың мақсаты – жастарға тәртіп, жауапкершілік және Отанға деген сүйіспеншілік сезімін дарыту, оларды әскери қызметті таңдау мүмкіндігіне дайындау. Бұл құндылықтар патриотизмді, көшбасшылық қасиеттерді және саптық даярлықты қалыптастырады. «Жас сарбаз» сыныбы жастарды болашақта әскери қызметті таңдауға бағыттайды. Адалдық антын қабылдау жас ұрпаққа Отанға деген сүйіспеншілік пен жауапкершілік сезімін ұялатады, – деп атап өтті Шығыс Қазақстан облысы Жастар сарбаздар қозғалысының төрағасы Даурен Шоматов.
Салтанатты ант қабылдау рәсімі Алтайлық жас сарбаздардың мерекелік концертімен аяқталды.
Оқи отырыңыз
