Бүгін Өскемен қаласындағы Арбат алаңы ұлттық өнердің асыл мұрасымен тербеліп, шын мәніндегі рухани мерекеге айналды. Ұлттық домбыра күніне арналған «Күй-тартыс» музыкалық кеші мен ашық аспан астында өткен «Музыкалық челлендж» қаланың әр түкпірінен келген тұрғындарды бір арнаға тоғыстырды, деп хабарлайды Altainews.kz тілшісі.

Шара барысында сахнаға алғашқылардың бірі болып, жас күйші Санжар Қайсаров шығып, ШҚО әкімі Нұрымбет Сақтағановты күймен қарсы алды. Бұл сәт – шынайы рух пен ізеттіктің көрінісіндей әсер қалдырды. Облыс әкімі қала жұртшылығымен бірге мерекелік кешті тамашалап, өнер иелеріне ризашылығын білдірді.

Ауа райының күрт бұзылуы, жауын жауғанына қарамастан, күй кеші жалғасын тапты. Кәсіби орындаушылармен қатар әуесқой күйшілер де күй тартысқа шығып, өзара шеберлік байқасты. Байжігіт атындағы қазақ ұлттық аспаптар оркестрі Арбаттың ашық алаңын әсем сазға бөлеп, тыңдарманды тәнті етті.

Кештің көркін аша түскен сәттердің бірі – мәдениет саласының үздігі, филармонияның белгілі әншісі Ботагөз Жұмабекованың орындауындағы әсерлі ән болды. Домбыра үнімен үндескен сырлы әуен көрерменнің ыстық ықыласына бөленді. Шара барысында жас өнерпаздар да өз таланттарын паш етті. Солардың бірі - Алтай музыка мектебінің оқушысы, Степное ауылынан келген он бір жастағы Дәулет Дәуренұлы алты-жеті күй шертті. 

Мерекелік кеш барысында бірнеше күй орындалып, күйдің тарихы мен маңызы туралы қысқаша мәліметтер де беріліп отырды. «Күй – елдің жаны. Ол – бабадан қалған аманат, болашаққа бағытталған үн», – дейді ұйымдастырушылар.

Ерасыл Ринатұлы Шығыс Қазақстан өнер училищесінде домбыра пәнінен сабақ береді. Сонымен қатар облыстық филармония жанындағы Байжігіт атындағы қазақ ұлттық аспаптар оркестрінің әртісі.

Кеш соңында домбыраның қос ішегінен төгілген әуен Арбатты шын мәнінде елдік пен руханияттың ордасына айналдырды. Бұл мереке тек күй тарту емес, елдің бірлігі мен мәдениетке деген құрметін паш еткен айтулы күн болды.

Фото: Махаббат Ахметжанова

Видео: Руслан Акматалиев