Шығыс Қазақстан облысы Марқакөл ауданында Австрия жолы бойындағы көлік көпірінде жөндеу жұмыстары жүргізілуде. Бұл жол Марқакөл ауылын Катонқарағай ауданымен байланыстырып жатыр, деп хабарлайды Altainews.kz.

Аудан әкімдігінің мәліметінше, жөндеу жұмыстары көлік инфрақұрылымын кезең-кезеңімен жаңарту аясында қолға алынған. Мақсат – жергілікті тұрғындар мен табиғи аймақтарда саяхаттайтын туристер үшін жол жүру жағдайын жақсарту.

Құрылыс барысын бірден бірнеше мекеме бақылап отыр: ауылдық әкімдік, «Марқакөл» мемлекеттік табиғи қорығы және орман шаруашылығының мамандары. Бұл тәсіл жөндеу мерзімінің, сапасының және қауіпсіздік пен экологиялық талаптардың сақталуын қамтамасыз етеді.

Реконструкция аяқталған соң көпірден өту әлдеқайда қауіпсіз әрі ыңғайлы болады. Әсіресе, Катонқарағай ұлттық паркі мен Марқакөл қорығына ағылатын туристер легі артатын жаз маусымында бұл аса өзекті.

Шығыстың көркем табиғатымен өтетін Австрия жолы – өңірдің маңызды көлік бағыттарының бірі әрі туристік брендіне айналған нысан. Осы бағыттағы көпір инфрақұрылымын жаңарту – еліміздің ең таза әрі шалғай өңірлерінің бірінде логистиканы жақсартып, экотуризмді дамыту жолындағы нақты қадам.

Дамир Омаров

Видео: Марқакөл ауданының әкімдігі