Шығыс Қазақстан облысының інжу-маржаны саналатын Марқакөл көліне жыл сайын мыңдаған туристер ағылып келеді. Табиғаттың бұл кереметі жергілікті тұрғындардың ғана емес, шетелдік саяхатшылардың да назарын аударған, деп хабарлайды  Altainews.kz тілшісі.    

Енді өңірдегі туризмді жаңа деңгейге көтеретін ерекше жоба қолға алынбақ – Қытаймен шекаралас «Теректі» өткізу бекетін ашу. Бұл жоба жергілікті экономиканы қалай өзгертеді? Жергілікті тұрғындар туристер ағынына дайын ба? 

Қазақстан Республикасы Президенті Қасым-Жомарт Тоқаевтың тапсырмасына сәйкес, Шығыс Қазақстан облысындағы Марқакөл маңында жаңа өткізу бекеті салынбақ. Жобаның басты мақсаты – Қытаймен шекара арқылы туристер легін ұлғайтып, өңірдің экономикалық әлеуетін дамыту. 

Өткізу бекеті «Теректі» атауымен Қытайдың Қаба аймағы мен Қазақстанның Күршім ауданы шекарасында орналасады. Бекетке апаратын 4 шақырымдық жолдың құрылысы және Марқакөл ауылынан Марқакөл көліне дейінгі 60 шақырым жолдың жөндеу жұмыстары жобаның негізгі бөліктеріне кіреді. Бекетті іске қосу үшін Қазақстан мен Қытай арасында үкіметаралық келісімге қол қойылуы қажет. Бұл келісім жүзеге асқаннан кейін, жол мен өткізу бекетін салу бойынша техникалық-экономикалық негіздеме дайындалып, жобалық-сметалық құжаттама әзірленеді. 

Құрылыстың алғашқы кезеңдері 2025 жылдың үшінші тоқсанында басталады деп жоспарланған. Жобаны жүзеге асыру шығындарының 90%-ы республикалық бюджеттен, ал қалған 10%-ы облыстық бюджеттен қаржыландырылады. Бұл бекет тек жеңіл және жолаушылар көліктеріне арналған болады. 

Жоба жүзеге асса, Марқакөл өңіріне туристер легі артады деп күтілуде. Өткізу бекеті арқылы шетелдік туристердің келуі өңірдегі инфрақұрылымның дамуына, жаңа жұмыс орындарының ашылуына және жергілікті кәсіпкерліктің өркендеуіне оң әсер етеді. Алайда, туристер санының көбеюі жергілікті тұрғындар мен табиғатқа белгілі бір қиындықтар да туғызуы мүмкін. Табиғат ресурстарын сақтап қалу үшін экотуризмді дамытуға назар аударылуы тиіс. 

«Теректі» өткізу бекетінің ашылуы – Марқакөл аймағының туристік әлеуетін арттыруға бағытталған маңызды қадам. Бұл жоба арқылы аймақ жаңа туристерді қабылдап қана қоймай, халықаралық деңгейдегі демалыс орнына айнала алады. Табиғи сұлулығы мен мәдени байлығын сақтай отырып, Марқакөл өз қонақтарын керемет көріністерімен және қонақжай халқымен қарсы алады.