Шекаралық аймақтарға жеке мәртебе берілуі мүмкін
depositphotos.com
Парламент Мәжілісінің депутаты Мақсат Толықбай шекаралық өңірлердің мәселесін шешу үшін арнайы заң жобасы әзірленетінін мәлімдеді. Оның айтуынша, шекара маңындағы ауылдардың жағдайы алаңдатарлық. Тұрғындар саны жылдан-жылға азайып, білім беру сапасы мен әлеуметтік жағдайлар күрделене түсуде, деп хабарлайды Altainews.kz тілшісі.
«Шекаралық аймақтағы ауылдардың жағдайын білесіздер. Мұнда қордаланған проблемалар өте көп. Халықтың саны азайып бара жатыр. Кейбір мектептердің өзінде 26-ақ бала оқиды. Осы мәселені көтеріп келе жатқанымызға 10 жылдың шамасы болды. Айналып келгенде бір заң қабылдау керек, жеке бағдарлама керек. Ауылда ешкімді ұстап отыра алмайсың», – деді депутат.
Ол сондай-ақ Мемлекет басшысының тапсырмасына сәйкес елмен кездесіп, ұсыныс-тілектерді жинау арқылы күзде шекаралық өңірлерді дамытуға арналған кешенді заң жобасын дайындау көзделіп отырғанын атап өтті.
«Түркістан туралы жеке мәртебе қабылдадық. Бұл сияқты елді мекендерді ұстап отыру үшін жеке статус беретін кез келді. Біз ұсынып отырған нормаға сәйкес, шекаралық өңірлерде жұмыс істегендердің бір жылы – бір жарым жылға есептеледі. Яғни, зейнетке 50 жастан шығуға мүмкіндік туады. Сонымен қатар, жалақыны 50 пайызға өсіру көзделеді», – деді Мақсат Толықбай.
Сондай-ақ депутат ауыл шаруашылығы мен кәсіпкерлікті қолдау үшін ауылда мал басын арттырып, халықтың табысын көтеруге бағытталған несиелерді де қарастыру керегін айтты.
«Сәтті жүзеге асса, елдің игілігіне жарайтын жобалардың бірі деп ойлаймын», – деді ол.
Фото: Екатерина Семина
Оқи отырыңыз
Қытаймен шекарадағы бұрынғы аудандардың мәртебесі қайтарылдыШекарадағы ауданды дамыту. Даниал Ахметов ақжарлықтармен кездесіп жатырМарқакөл жағалауында туристік нысандар салынадыДепутаттар Семей қаласының статусын өзгерткісі келедіШығыс Қазақстанда шекаралық аймақтағы жер учаскелерін қорғау мәселелері талқылануда
