Бүгін Шығыс Қазақстан облысының Үлкен Нарын ауылында Шанхай ынтымақтастық ұйымына мүше мемлекеттердің жастар делегациясының қатысуымен SCO Youth Dialogue халықаралық форумы басталды, деп хабарлайды Altainews.kz тілшісі.

Ауқымды шараға Қытай Халық Республикасы, Ресей Федерациясы, Қырғыз Республикасы, Өзбекстан Республикасы және Тәжікстан Республикасының жас көшбасшылары, еріктілері мен қоғам белсенділері жиналды. Форум аясында қатысушылар тұрақты даму бағытындағы ынтымақтастықты, жастар бастамаларын жүзеге асыру тәжірибесін талқылап, ШЫҰ елдері арасындағы жаңа серіктестік векторларын белгіледі.

Айта кетейік, форум 2024 жылғы шілдеде Астанада өткен «ШЫҰ плюс» форматындағы саммитте қол жеткізілген келісімдер аясында ұйымдастырылды. Сол кезде Қазақстан Президенті Қасым-Жомарт Тоқаев жаһандық сын-қатерлер алдында жастар бірлігінің маңыздылығын және бейбітшілік пен тұрақты даму жолында ортақ қимылдардың қажеттілігін ерекше атап өткен болатын.

Шара аясында жастар тек пікір алмасып қана қоймай, шынайы достық орнатып, мәдениеттермен танысып, өзара сенімге негізделген жаңа бастамаларға жол ашты. Форумға қатысушылар Шығыс Қазақстанның таңғажайып табиғатына тәнті болып, қонақжайлық пен ұйымшылдық деңгейіне жоғары баға берді.

Форум барысында қатысушылар шекара мен айырмашылықтарды ұмытып, ортақ болашақты бірге құруға бейілді екенін көрсетті.

Фото: ШҚО әкімдігі