Абайдың 180 жылдық мерейтойын тойлауға арналған онкүндік мерекелік іс-шаралар легінде бүгін ұйымдастырылған халық әртісі Майра Ильясованың “Айналдым елім” атты ән кеші аншлагпен өтті. Абай атындағы театр іші көрерменге лық толды — семейліктердің сүйікті әншісіне деген ықыласы айрықша, деп хабарлайды Altainews.kz Абай облысының Өңірлік коммуникациялар қызметіне сілтеме жасап.

Кеш еркін әрі ерекше форматта өтті. Халықтың сүйіктісі көрермендермен еркін байланыс орнатып, Абайға қатысты сұрақ қойып, сондай-ақ, оның әндерін үздік орындаған көрерменге арнайы естелік сыйлық табыстады.

Айта кетейік, Абай Құнанбайұлының 180 жылдығына орай облыс аумағында онкүндік мәдени бағдарламалар жалғасып жатыр. Барлық шаралар ашық есік форматында, яғни көрермендер үшін тегін ұйымдастырылуда.

Кеште сондай-ақ Қазақстанның еңбек сіңірген әртісі, дәстүрлі әнші Бисара Макенова, “Жас Қанат – 2016” байқауының жеңімпазы Парасат Отан және халықаралық байқаулардың лауреаттары — “Әдемі-ай” дуэті өнер көрсетті.

Гастрольдік сапар аясында “Айналдым елім” концерті 3-6 тамыз күндері Үржар, Аягөз, Жарма және Жаңасемей аудандарында жалғасады.

Фото: 018.KZ — ABAI AQPARAT 

Видео: Абай облысының ӨКҚ