Қытай Халық Республикасының Синьцзян-Ұйғыр автономиялық ауданында Шанхай ынтымақтастық ұйымы (ШЫҰ) аясында цифрлық технологиялар саласындағы кадрларды даярлауға арналған халықаралық оқыту семинары өтуде, деп хабарлайды Altainews.kz тілшісі.

Мемлекет басшысы өз Жолдауында алдағы үш жыл ішінде Қазақстан жасанды интеллектіні енгізу және IT-инфрақұрылымды дамыту бағытында ауқымды қадамдар жасау қажет екенін атап өткен болатын.

Қазақстандық делегация құрамына университеттер мен колледждердің басшылығы, сондай-ақ IT, жасанды интеллект, қаржы және креативті экономика салаларында жұмыс істейтін кәсіпкерлер енді.

Делегацияны ШҚО туризм кеңесінің төрағасы Сымбат Рамазанов бастап барды. Ол цифрлық технологиялар саласында білікті мамандарды даярлау Қазақстанның болашағы үшін аса маңызды екенін атап өтті.

Алты күнге созылатын бағдарлама барысында делегаттар IT-хабтарды, технологиялық парктер мен инновациялық компанияларды аралап, жасанды интеллект негізіндегі шешімдердің қалай енгізіліп жатқанымен танысады. Қатысушылар цифрландырудың үздік тәжірибелерін білім беру, бизнес және мемлекеттік басқару салаларында зерделейді.

Семинарға Қытай, Ресей, Қырғызстан және Өзбекстан елдерінің өкілдері қатысуда. Бұл алаң цифрлық даму саласындағы халықаралық тәжірибе алмасу мен ынтымақтастықты нығайту үшін бірегей мүмкіндік болып отыр.