Шығыс Қазақстан облысында жеке тұлғалардың мүлік және көлік салығы бойынша берешегі 1 млрд теңгеден асты. Бұл туралы Мемлекеттік кірістер департаменті басшысының орынбасары Қабыш Сайранқан Өңірлік коммуникациялар қызметі алаңында өткен баспасөз конференциясында мәлім етті, деп хабарлайды Altainews.kz тілшісі 

Оның айтуынша, 2025 жылдың 1 сәуірінен кейін төлеу мерзімі аяқталған соң 1,09 млрд теңге салық берешегі қалыптасқан.

Салық берешегін азайту мақсатында ескерту хаттары жолданып, төлем болмаған жағдайда материалдар жеке сот орындаушыларына жіберіледі. Олар мәжбүрлеп өндіріп алу шараларын қолдана алады. Яғни, мүлік пен банк шоттарына тыйым салу, елден шығуға шектеу қою, көлік жүргізу құқығынан айыру секілді.

2025 жылдың басынан бері 789 рейд өткізілді, нәтижесінде 17,6 млн теңге берешек өтелді. Сондай-ақ жұмыс істейтін борышкерлерден 7,5 млн теңге қосымша өндірілді.