«Қазгидромет» Шығыс Қазақстан филиалының деректері бойынша, 1 қараша күні өңірде ауа райы тұрақсыз болады. Түнде және таңертең облыстың солтүстігі мен оңтүстігінде тұман түседі. Кей жерлерде аздаған жаңбыр, ал таулы аймақтарда жаңбыр мен қар аралас жауын-шашын күтіледі, деп хабарлайды Altainews.kz тілшісі.

Желдің бағыты ауыспалы, екпіні 15–20 м/с, күндіз кей жерлерде 25 м/с дейін жетуі мүмкін.

Өскемен қаласында да желдің күшеюі күтіледі — екпіні 15–20 м/с, күндіз 23 м/с дейін.

Мамандар тұрғындарды ауа райының қолайсыздығына байланысты сақтық шараларын сақтауға шақырады:

• Автокөлік жүргізушілері жолда мұқият болып, жылдамдықты азайтуы қажет;
• Жаяу жүргіншілер жел кезінде ғимараттардың ішіне кіріп тұрғандары дұрыс;
• Ағаштардың, жарнама қалқандары мен үйлердің қабырғаларының маңында паналамаңыз;
• Үзілген сымдар мен бос тұрған заттарға жақындамаңыз;
• Көліктерді шіріген немесе ескі ағаштардың астына қоймаңыз.

Төтенше жағдай орын алған жағдайда бірыңғай құтқару қызметінің 112 нөміріне хабарласыңыз.