Бүгін Қытайда өткен халықаралық кәсіби шеберлік чемпионаты – World Vocational College Skills Competition 2025 байқауында қола медальді еншілеген Д.Серікбаев атындағы Шығыс Қазақстан техникалық университетінің студенттерін жерлестері салтанатты түрде қарсы алды, деп хабарлайды Altainews.kz тілшісі. 

World Vocational College Skills – техникалық мамандарды дайындау саласындағы әлемдегі ең ауқымды іс-шаралардың бірі. Биылғы жарыс Тяньцзинь қаласында өткізіліп, оған 76 елден 33 мыңнан астам қатысушы және 8 956 команда қатысты. Жас мамандар заман талаптарына сай ондаған техникалық және өндірістік бағыттар бойынша біліктіліктерін көрсетті.

ШҚТУ командасы қатаң халықаралық бәсекеде жоғары кәсіби шеберлік, тың шешім қабылдау қабілеті мен төзімділік танытты. Бұл жетістік Қазақстандағы инженерлік білім беру деңгейінің жоғары екенінің айқын дәлелі.

Өскемен әуежайында студенттерді университет өкілдері, курстастары және жақындары зор қуанышпен қарсы алды. Солардың бірі – қатысушының анасы Эрика Шунакова.  

Команда капитаны Ілияс Исақанов жартылай финал кезеңі аса шиеленісті өткенін айтты.

ҚР командасы, әсіресе, электромобильдерге арналған бағытта ерекшеленді. Бұл табыс үш жыл бойы жұмыс істеп келе жатқан, Қазақстан мен Қытай көшбасшыларының «Қазақстан – Орталық Азия» саммитіндегі бастамасы негізінде құрылған «Лу Бань» шеберханасындағы жүйелі дайындықтың жемісі болды. Мұнда заманауи автокөлік техникасы бойынша мамандар даярланады.

Бұл жеңіс техникалық мамандықтарды таңдаған жастарға жаңа серпін беріп, халықаралық деңгейдегі жаңа жобаларға жол ашты.

Роксана Глыбова

Жібек Нұрахмет