ҚР Үкіметі: 2026–2028 жылдарға арналған макроэкономикалық тұрақтандыру және халықтың әл-ауқатын арттыруға бағытталған бағдарлама іске қосылады
Қазақстан Үкіметі Президент тапсырмаларының аясында макроэкономикалық тұрақтылықты қамтамасыз ету, инфляцияны төмендету, халықтың әл-ауқатын арттыру және экономиканы әртараптандыру мақсатында Ұлттық банк және Қаржы нарығын реттеу агенттігімен бірлескен үш жылдық іс-қимыл бағдарламасын әзірледі. Бағдарлама келесі үш жылда елдің әлеуметтік-экономикалық даму бағытын айқындайтын негізгі құжат болмақ, деп хабарлайды Altainews.kz ел Үкіметіне сілтеме жасап.
Үкімет отырысында Премьер-министр Олжас Бектенов Үкіметтің Ұлттық банкпен және Қаржы нарығын реттеу және дамыту агенттігімен бірлесіп, Президенттің Қазақстан халқына Жолдауында айтылған 2026–2028 жылдарға арналған макроэкономикалық тұрақтылық және халықтың әл-ауқатын жақсарту жөніндегі тапсырмаларын орындау мақсатында ауқымды бірлескен іс-қимыл бағдарламасын әзірлегенін атап өтті. Бұл бағдарлама мемлекеттің алдағы үш жылдағы экономикалық саясатының бағыттарын анықтайтын негізгі стратегиялық құжат ретінде қарастырылады.
Ұлттық экономика министрлігінің мәлімдеуінше, құжат ұлттық экономиканы дамытудың негізгі бағыттарын қамтиды. Оның ішінде халықтың табысын қолдау, экономиканың сапалы және орнықты өсуін қамтамасыз ету, шикізаттық емес экспортты ынталандыру, цифрландыру мен жасанды интеллектіні дамыту, инвестициялық климатты жетілдіру, тарифтік саясатты оңтайландыру, инфляцияны бақылау және экономикалық саладағы мемлекеттік қатысуды азайту секілді стратегиялық мақсаттар бар. Сонымен қатар бағдарлама ақша-несие саясатын, қаржы секторын дамыту шараларын және бағаны реттеу тетіктерін де қамтиды.
Премьер-министр Үкіметтің, Ұлттық Банктің және Қаржы нарығын реттеу агенттігінің бірлескен іс-қимыл бағдарламасы еліміздің алдағы үш жылға арналған әлеуметтік-экономикалық дамуының негізгі міндеттерін шешуге бағытталғанын ерекше атап өтті.
Экономикалық өсімді тұрақтандырудың негізгі өлшемдерінің бірі ретінде халық табысының артуы белгіленді.
Үкімет басшысы алдағы жылдары инфляцияны төмендету, тарифтік саясатты теңгерімді жүргізу, экспортты ұлғайту және импортқа тәуелділікті төмендету бағытына ерекше басымдық берілетінін жеткізді. Бұл шаралар ішкі нарықтың тұрақтылығын қамтамасыз етуге және экономиканың сыртқы әсерлерге төзімділігін арттыруға мүмкіндік береді.
Премьер-министр отын балансы мен мұнай өнімдерінің ағынын бақылау мәселесіне де ерекше тоқталды. Оның айтуынша, енгізілген жанар-жағармай бағасын көтеруге мораторий көршілес елдермен арадағы баға айырмашылығын арттырып отыр.
Азық-түлік нарығындағы тұрақтылық та Үкіметтің негізгі назарында. Бектенов азық-түлік қауіпсіздігін қамтамасыз ету және импортқа тәуелді өнімдер өндірісін ұлғайту бойынша нақты міндеттер жүктеді.
Экспортты әртараптандыру бағытында да жаңа тапсырмалар берілді. Премьер-министр шикізаттық емес өнімдерге сұранысты арттыру, жаңа өткізу нарықтарын қалыптастыру және жоғары қосылған құны бар өнім шығарушыларды қолдау қажеттігін айтты.
«Экономиканы әртараптандыру аясында шикізаттық емес экспортты белсенді дамытуға және өткізу нарықтарын кеңейтуге күш салу керек. Қосылған құны жоғары өнім шығаратын отандық экспорттаушыларды қолдау құралдарын көбейту қажет. Атап айтқанда, қаржылық, институционалдық шаралар, логистика, отандық тауарларды шетелдерде және халықаралық электрондық алаңдарда ілгерілету бағытында жәрдем көрсету керек. Бұл ретте мемлекеттік қолдауға ие болған экспорттаушылар өз кәсіпорындарын белсенді түрде жаңғыртып, өндірісті локализациялау үлесін арттыруға тиіс», — деп атап өтті Олжас Бектенов.
Сонымен қатар Сауда министрлігіне және өңір әкімдеріне делдалдық схемаларды анықтау, бағаның өсуіне ықпал ететін жасанды тетіктерді жою тапсырылды.
Инвестициялық саясатты жетілдіру, банктердің нақты секторды қаржыландыруын күшейту де негізгі міндеттердің бірі ретінде белгіленді.
Агроөнеркәсіп кешенінде терең өңделген өнім өндірісін дамыту да стратегиялық мақсаттардың бірі ретінде аталды.
Фото: ҚР Үкіметі
