Жаңа жыл алдында өрт пен жарақат қаупінің артуына байланысты ТЖМ мен ІІМ 1 желтоқсаннан бастап ел бойынша «Газбаллон», «Қауіпсіз Жаңа жыл» және «Пиротехника» атты кең ауқымды профилактикалық акцияларды іске қосып, мерекелік шаралар өтетін орындарда қауіпсіздік бақылауын күшейтетінін мәлімдеді, деп хабарлайды Altainews.kz тілшісі ҚР Төтенше жағдайлар министрлігінің баспасөз қызметіне сілтеме жасап.

Жаңа жыл мерекелері кезінде қауіпсіздікті күшейту үшін Төтенше жағдайлар министрлігі мен Ішкі істер министрлігі алдын алу шараларының бірлескен жоспарына қол қойды. Халық көп жиналатын сауда орталықтары, базарлар, ойын-сауық орындары және пиротехниканы кең қолдану өрт пен түрлі төтенше жағдайлардың қаупін арттыратыны атап өтілді.

Осыған байланысты 2025 жылғы 1 желтоқсаннан бастап ел бойынша ауқымды профилактикалық науқан іске қосылады.

Үш негізгі акция жүргізіледі:

«Газбаллон» – газбаллон жабдықтарын пайдалану кезіндегі бұзушылықтардың алдын алу, рейдтер мен түсіндіру жұмыстарын күшейту;

«Қауіпсіз Жаңа жыл» – мерекелік іс-шара өтетін орындарда эвакуациялық шығуларды, өрт дабылдарын, қауіпсіздік нормаларын тексеру;

«Пиротехника» – пиротехникалық өнімдерді сақтау, сату және пайдалану талаптарының сақталуын бақылау.

Акциялар аясында рейдтер, тұрғындармен және кәсіпкерлермен кездесулер өткізілмек. Министрліктер азаматтарды қауіпсіздік ережелерін қатаң сақтауға шақырды.