Тәуелсіздік мерекесі қарсаңында Марқакөл ауданында ауыл шаруашылығы өнімдерін өндіруге бағытталған жаңа өндіріс орны іске қосылды. «Бекзат 2024» ауыл шаруашылық өнер кәсібі «Ауыл аманаты» бағдарламасының қолдауымен жем-шөп өндіретін цехқа қажетті заманауи жабдықтар алып, толық циклды қолданысқа енгізді. Бұл – Мемлекет басшысы Қасым-Жомарт Кемелұлы Тоқаевтың ауылдық өңірлерді дамыту, кәсіпкерлікті қолдау жөніндегі тапсырмаларының нақты жүзеге асырылып жатқанын айқын көрсететін жобалардың бірі, деп хабарлайды Altainews.kz.

Жаңа нысанның ресми ашылуына Марқакөл ауданының әкімі Рүстембек Кемешев қатысып, өндірістің аймақ үшін маңызын атап өтті.

Өндіріс орнын ашқан кәсіпкер – Данияр Оразиманов. Ол «Ауыл аманаты» бағдарламасы бойынша төмен пайызды несие алып, жобасын жүзеге асыруға мүмкіндік алғанын айтады.

Жаңа цехтың іске қосылуы Марқакөл ауданының аграрлық әлеуетін арттырып қана қоймай, жергілікті шаруаларға үлкен қолдау болмақ. Жем-шөп өндірудің жолға қойылуы мал шаруашылығының өнімділігін арттырып, аудан экономикасына қосымша серпін береді. Бұған қоса, жаңа өндіріс бірнеше жергілікті тұрғынды жұмыспен қамтып, ауылдағы еңбек нарығына да оң ықпал етпек.

Жоба алдағы уақытта өңірдегі ауыл шаруашылығы кооперативтерімен бірлесе жұмыс істеп, өнім көлемін жыл сайын ұлғайтуды жоспарлап отыр.