Бұқтырма су қоймасы – жазда көп адам келетін танымал демалыс орны. Су жағасында шомылып, табиғат аясында тынығатындар көбейетіндіктен, қауіпсіздік мәселесіне де ерекше назар аударылады. Шығыс Қазақстан облысының Төтенше жағдайлар департаменті Самар ауданының Новостройка ауылында арнайы құтқарушылар бекетін ашты, деп хабарлайды Altainews.kz тілшісі ШҚО ТЖД баспасөз қызметіне сілтеме жасап.

Жаңа бекетте жаз бойы құтқарушылар мен өрт сөндірушілер кезекшілік атқарады. Олар төтенше жағдай бола қалса, жылдам көмек көрсетуге дайын. Қызметкерлер арнайы құтқару құралдарымен, жүзуге арналған қайықтармен және өрт сөндіру көлігімен жабдықталған.

Құтқарушылар су қоймасындағы қауіпсіздікке бақылау жүргізсе, өрт сөндірушілер 110 шақырымға созылатын жағалауды аралап, демалушылар мен демалыс орындарының иелеріне өрт қауіпсіздігі ережелерін түсіндіреді. Сонымен қатар, ақпараттық парақшалар таратып, түсіндіру жұмыстары да жүргізіледі.

Бұқтырмада демалғысы келетіндер үшін бұл – жақсы жаңалық. Өйткені мұндай бақылау – тынығушылардың қауіпсіз демалуына мүмкіндік береді.