«Әділдік жолы» қоғамдық ұйымының мүшесі Әділ Пшенов «Сыбайлас жемқорлыққа қарсы волонтерлік» жобасының аясында «Өскемен-Алматы» тасжолының Жібек Жолы көшесінен қала шекарасына дейінгі бөлігінде істелген жұмыстарға қоғамдық мониторинг жүргізді.

Жолдың осы бөлігі – қаладағы маңызды учаскенің бірі, деп хабарлайды Altaynews тілшісі.

ШҚО сыбайлас жемқорлыққа қарсы қызметінің дерегінше, биыл мамыр айында мердігер аталған учаскедегі асфальт төсеу жұмыстарын 1 шілдеге дейін бітіруге уәде берген көрінеді. Алайда жүргізушілер жолдың сапасына наразылық білдірген.

Мердігер қолданысқа тапсыру мерзімін шегерудің себебі ретінде шілде айында битумның жетіспеушілігі туындауын және бағаның өсуін атаған.

ШҚО сыбайлас жемқорлыққа қарсы қызметі ұсынған мәліметке сүйенсек, жол құрылысы келесі жылы толық аяқталады.