Өскемендегі сауда орындары импорттық тауарларға толып тұр. Ішінара еліміздің өзге өңірлерінен жеткізілгендері де бар. Өкініштісі сол, жергілікті жерде өндіріліп жатқан өз өнімдерімізді қаланың дүкендерінен кездестіре алмаймыз. Осы орайда отандық өндірушілерді қолдау арқылы нарықтағы импорттың үлесін азайту жөнінде ШҚО әкімі Ермек Көшербаев жауапты сала басшыларына тапсырма берген, деп хабарлайды Altainews.kz тілшісі.

«ВостокТехноСнаб» жеке кәсіпкерлігінің цехы 6 жылдан бері шұжық өнімдерін шығарып келеді. Бірақ өскемендіктердің көбі өзімізде осындай шұжық өндірілетінін білмейтін тәрізді. Қалай десек те кәсіпкер өз өнімін өткізуде көп кедергі көріп отырғанын айтады.

Кәсіпорында 11 адам жұмыс істейді. Тәулігіне 1,5 тонна өнім өндіруге әлеуетті цехта шұжықтың 30-дан астам, деликатестің оннан астам түрі шығарылады.

Былтыр Алматыда өткен отандық тауар өндірушілердің «ULTTYQ ÓNIM-2023» көрмесінде «ВостокТехноСнаб» жеңімпаз атанғанын айта кеткен абзал.

Фото: Валерий Шведов