Қазақстан Ұлттық Банкі монета өнімдерін кеңінен насихаттау үшін «Қазақстан монеталары» мобильді қосымшасын қолданысқа енгізді.

Мобильді қосымша циркуляциялық, коллекциялық және инвестициялық монеталардың электронды каталогы түрінде әзірленді, деп хабарлайды Altaynews Қазақпарат агенттігіне сілтеме жасап.

Қосымшада ҚҰБ шығарған барлық монетаға қатысты ақпарат топтастырылған.

Қосымшада әр серия бойынша шығарылған монеталардың қысқаша сипаттамасымен тақырыптық бөлімдер қамтылып отыр. Кейбір жекелеген монеталар туралы видеороликтерге, монеталардың 3D-кескініне, толықтырылған шынайылық элементтеріне сілтеме берілген.

Мобильді қосымшада арнайы опция бар. Соның көмегімен пайдаланушы өзінің электронды базасын (коллекция жиынтығын) жасай алады. Бұл – қолда бар монеталардың қағаздағы есебінің тиімді баламасы. Коллекциялық монеталар бұрынғыша ҚҰБ интернет-дүкені арқылы сатылады.

Мобильді қосымша Қазақстанның нумизматика тарихынан сыр шертіп, түрлі дәуірлер мен кезеңдердегі сәулет және мәдени ескерткіштермен, маңызды тарихи оқиғалармен, қазақ халқының көрнекті қайраткерлерімен, бай мәдениетімен және дәстүрімен танысуға мүмкіндік береді.

ҚҰБ коллекциялық монеталарды шығара отырып, Қазақстанды, тұмса табиғатының сұлулығын, халқының дәстүрі мен бай тарихын таныстырады. Монета өндірісінің заманауи жетістіктері мен мамандардың кәсіби шеберлігін паш етеді.