Шілденің соңғы екі аптасында әлеуметтік маңызы бар өнімдерге -0,2% мөлшерінде дефляция тіркелді.

Премьер-Министрдің орынбасары Серік Жұманғарин қатысқан отырыста нәтиже мен азық-түлік бағасын тұрақтандыру шаралары талқыланды, деп хабарлайды Altaynews primeminister.kz ресурсына сілтеме жасап.

Тоғыз тауар бойынша баға төмендеген. Баға түсуінің ұзақтығы бойынша күнбағыс майы, қарақұмық, құс еті көш бастап тұр. Өткен аптада пияз, қант, сәбіз, картоп, ұн, тұздың баға индексі төмендеді.

Ал қырыққабат, жұмыртқа, күріш сынды өнімдердің бағасының шамалы өсу үрдісі сақталған. Кеңес барысында осы мәселеге ерекше назар аударылды.

Сонымен қатар ол айналым схемасы арқылы сатып алуды ұйымдастыру бойынша Қазақстанның жұмыртқа өндірушілер қауымдастығымен жұмыс жүріп жатқанын айтты. Өңірлерге тікелей өндіруші зауыттармен келісімшарттар жасауды қамтамасыз ету тапсырылды.

Делдалдық схемаларды тергеу жөніндегі өңірлік комиссиялардың жұмысы бөлек қаралды. Жыл басынан бері комиссиялар 1 108 отырыс өткізіп, 360 өнімсіз делдал жойылды, 716 тізбек талданып, 122 факт бойынша сауда үстемесін асыру қаупі анықталды.

Сонымен қатар кеңес барысында ауыл шаруашылығы вице-министрі Бағлан Бекбауов баяндама жасады, ол 2024 жылғы маусымаралық кезеңге өңірлерде пияз және сәбіз бойынша ұсынылған көлем жиналғанын хабарлады. Әкімдіктермен бірлесіп, картоп, қырыққабат, қарақұмық жармасы, күріш, күнбағыс майы, ұн және қантқа форвардтық келісімшарт жасасу бойынша жұмыс жалғасып жатқан көрінеді.