Ұшақ билеті арзандауы мүмкін бе?
Фото: egemen.kz
Мәжіліс депутаты Айдос Сарым ұшақ билетінің бағасының қымбаттауы туралы айтты.
Ол жолаушыларға қолжетімді бағаға билет ұсыну мақсатында құрылған әуе компаниясының бағалары шарықтап тұрғанын жеткізді, деп хабарлайды Altaynews Kazinform агенттігіне сілтеме жасап.
– Тұтынушылар мен сарапшылар қауымдастығы әуе тасымалы бағасы мәселесін үнемі көтеріп жүр. Бұл туралы талай депутаттық сауал да болды. Атап айтқанда, адамдар төмен бюджетті әуе компаниясында билет бағасының күн сайын қымбаттап бара жатқанын айтады. Air Astana әуе компаниясының еншілес кәсіпорны Fly Arystan жолаушыларды қолжетімді бағадағы билетпен қамту үшін құрылған еді. Бұл ішкі туризмнің дамуына ықпал етуге тиіс болатын. Ал іс жүзінде лоукостер билеттерінің бағасы бас компанияның билетімен теңесіп, жылдан-жылға өсіп жатыр. Осындай баға масқара емес пе? Министр мырза, болашақта азаматтарымыз әуе билетін қолжетімді бағада сатып алу үшін министрлік қандай шаралар қарастырған? – деп сауал жолдады Айдос Сарым Көлік министріне.
Көлік министрі Марат Қарабаевтың айтуынша, бұл мәселе қазір өте өзекті.
– Мысалы, былтыр 2020-2021 жылдармен салыстырғанда әуе тасымалына сұраныс 17% өсті. Биыл 26%-ға өсіп отыр. Яғни сұраныс бар, ал ұсыныс оған төтеп бере алмай отыр. Ол үшін ұшақтардың санын ұлғайту қажет. Былтыр 14 ұшақ сатып алынды, биыл жыл соңына дейін әуе компаниялары тағы 11 ұшақ алады, – деп жауап берді ол.
Министрдің айтуынша, нәтижесінде қазақстандық ұшақтардың саны 100-ге жетеді және ондағы орындық саны 12 мыңнан 15 мыңға артады.
– Оған қоса 2024-2025 жылдары тағы 14 ұшақ сатып алу жоспарланып отыр. Екінші мәселе – әрине бәсекелестікті дамыту керек. Бұл бағытта Fly Arystan-ды Air Astana әуе компаниясынан жеке шығарып жатыр. Нәтижесінде 4 әуе компаниясы болады, осылайша бәсеке артады. Оған қоса шетелдік әуе компаниясын тартып, 5-ші компания ретінде дамыту жоспары бар, – дейді Марат Қарабаев.
Оқи отырыңыз
