Биыл Шығыс Қазақстан облысында мектеп оқушыларын өңірдің мәдени әрі тарихи мұрасымен таныстыруға арналған ерекше жоба – «Киелі Шығыс» бағдарламасы жүзеге асырыла бастайды, деп хабарлайды Altainews.kz тілшісі.

Бағдарлама аясында ШҚО-ның тарихи ескерткіштері мен табиғи нысандарын қамтитын білім беру бағытындағы туристік маршруттар қарастырылған. Бұл оқу-танымдық турлармен 200-ге жуық оқушы қамтылады.

Бағдарлама 7-10 сынып оқушыларына арналған. Маршруттар облыстың барлық аудандарынан жиналған балаларды қамтып, «Берел қорғандары» ашық аспан астындағы музейі, Қиын-Керіш шатқалы, киелі нысандар мен ұлттық табиғи парктерді аралауды көздейді.

Турлар бірнеше бағытты біріктіреді: экскурсиялық бөлім – археологтар мен өлкетанушылардың жетекшілігімен Берел қорғандары мен көне қоныстардың қирандыларына бару; тәжірибелік сабақтар – туризм негіздеріне арналған мастер-класстар (палатка құру, карта мен компас арқылы бағдарлану, бастапқы альпинистік машықтар); мәдени-танымдық сессиялар – қазақ халқының тарихы, дәстүрлі қолөнер, фольклормен танысу, интерактивті дәрістер мен сабақтар; экологиялық бағыт – қорғалатын аймақтарды тазалау, көшет отырғызу, экожүйелерді бақылау шаралары ұйымдастырылады.

Жоба өлкетану қоғамы мен ұлттық парктердің қолдауымен жүзеге асырылады. Экспедицияларға тәжірибелі гидтер, педагог-кураторлар, эколог мамандар мен медицина қызметкерлері бірге барады.