Шығыс Қазақстан облысында республикалық маңызы бар автожолдарды 2024-2025 жылғы қысқы маусымға дайындау жұмыстары толық көлемде жүргізілді. Аймақтағы жалпы ұзындығы 957 шақырымды құрайтын республикалық автожолдарда қозғалыс қауіпсіздігі мен үздіксіздігін қамтамасыз ету мақсатында жан-жақты дайындық шаралары қабылданды, деп хабарлайды Altainews.kz тілшісі.

Шығыс Қазақстан облысында 2024-2025 жылғы күзгі-қысқы кезеңге автомобиль жолдарын күтіп ұстау жұмыстары жүргізілді. Аймақтағы республикалық автомобиль жолдарының жалпы ұзындығы 957 шақырымды құрайды. Оларға қызмет көрсетуді «ҚазАвтоЖол» ҰК» АҚ ШҚОФ және «КажСервис» ЖШС бірлесіп жүзеге асырады. Жол күтіміне арналған өндірістік базалар мен техника дайындық деңгейі және материалдық қамтамасыз ету жайы арнайы жоспар аясында бақыланды. 

Жолдарды тазарту және күту үшін 99 техника қарастырылған. Оның 84-і (85%) жарамды, ал 15-і жөндеуді қажет етеді. Сонымен қатар қосымша 8 техника сатып алынып, 16 техника жалға алынды. Шнекороторлардың 10-ы, жол машиналарының 30-ы, автогрейдерлердің 11-і, бульдозерлердің 4-і жұмысқа жарамды. Тракторлар мен тиегіштер толық дайын. Жалға алынатын техниканың ішінде автогрейдерлер, тиегіштер және тракторлар қарастырылған. Бұл техникаларды жыл соңына дейін пайдалануға алу жоспарланып отыр. 

Ағымдағы жылы өңірдегі екі ірі жаңарту жұмыстары жалғасуда. Талдықорған – Қалбатау – Өскемен жолының 60 км учаскесі (1013-1073 км), Қалбатау – Майқапшағай жолы бойынша 181 км ұзындықтағы 5 учаскенің 4-і пайдалануға берілді. Қайта жаңартылған учаскелерді қысқы күтіммен «КажСервис» ЖШС айналысады.  

Шығыс Қазақстан облысында жолдардың қысқы күтіміне дайындық жүйелі түрде жүзеге асты. Материалдық база мен техниканың дайындығы жоспарға сай аяқталды. Сонымен қатар қайта жаңартылған учаскелерде жұмыс істеу үшін қосымша шаралар қабылдануда. Бұл облыс жолдарында қауіпсіз және үздіксіз қозғалысты қамтамасыз етудің негізі болмақ.

«ҚазАвтоЖол» ҰК» АҚ ШҚОФ директоры Нұрбек Темірхановтың айтуынша, жол қозғалысын үздіксіз және қауіпсіз қамтамасыз етуге бағытталған жұмыстар толық бақылауда. 

Шығыс Қазақстан облысында республикалық автожолдардың қысқы маусымға дайындығы жоспарға сай аяқталып, жол қозғалысының қауіпсіздігі мен үздіксіздігін қамтамасыз ету үшін барлық қажетті шаралар қабылданды. Материалдық база мен техниканың толық әзірлігі, қайта жаңартылған учаскелердің қысқы күтімге алынуы өңірдегі көлік қатынасының сенімділігін арттырады. Бұл жұмыстар аймақ тұрғындарының және жол пайдаланушыларының қауіпсіздігін қамтамасыз етудің басты негізі болмақ. 

Ержан Әбіш