27 шілдеде ШҚО ПД ішкі істер органдарына қызметке алу үшін кандидаттарды іріктеу жөніндегі конкурстық комиссияның отырысы өтті.

ПД бастығының орынбасары, полиция полковнигі Ренат Унарбеков төрағалық еткен комиссия отырысына ПД қызметтерінің басшылары қатысты, деп хабарлайды Altaynews тілшісі.

Сонымен қатар конкурстық комиссия жұмысының ашықтығы мен объективтілігін қамтамасыз ету үшін ШҚО ішкі істер органдары мен Ұлттық ұлан ардагерлер кеңесі төрағасының орынбасары Көпен Қайырбаев, ПД жанындағы консультативтік-кеңесші органның мүшесі, "Қазцинк" ЖШС кәсіподақ комитетінің төрағасы Сергей Солдатов шақырылды.

Әңгімелесуге ҚР заңнамасын білу деңгейін тексеру тестілеуінде жақсы нәтиже көрсеткен, денешынықтыру даярлығы бойынша нормативтерді тапсырған 26 үміткер шақырылды. Әңгімелесу үміткерлердің кәсіби және жеке қасиеттерін бағалау мақсатында ұйымдастырылды.

Кандидаттар ішкі істер органдарына тағылымдамадан өтуші ретінде қабылданады. Содан кейін ІІМ оқу орындарының бастапқы даярлық курстарына біліктілікті жетілдіруге жіберіледі.