ХХ ғасырда жасалған тағы бір қару ШҚО-да табылды
Фото: polisia.kz
Өскемен қаласында ШҚО бойынша ҚАЖ департаментінің қызметкерлері полицейлермен бірлесіп қару-жарақ жасырылған орынды тапты.
Жасырын қойма облыс орталығынан 18 шақырымда орналасқан Самсоновка ауылындағы көпірдің астынан табылды, деп хабарлайды Altaynews Polisia.kz сайтына сілтеме жасап.
Жедел-іздестіру іс-шараларын өткізу барысында ШҚО полиция департаментінің қызметкерлері мен ҚАЖК №17 мекемесінің және Өскемен қаласы ПБ Сол жағалау ПБ жедел-тергеу тобының қызметкерлері атыс қаруына ұқсас затты анықтады. Сараптама көрсеткендей, тәркіленген қару ЗК моделінің тегіс ұңғылы Курск аңшылық мылтығының кесіндісі болып шықты. Қару ХХ ғасырда оқпанды қысқартып, шүйдесін алып тастау арқылы қолдан жасалған.
Аталған дерекке қатысты ҚР ҚК-нің 287-бабы 3-бөлігі (Қаруды оқ-дәрілерді жарылғыш заттар мен жарылғыш құрылғыларды заңсыз сатып алу, беру, өткізу, сақтау, тасымалдау немесе алып жүру) бойынша сотқа дейінгі тергеп-тексеру басталды.