Облыс орталығының тұрғындары мен қонақтары әр сенбіде жәрмеңкеге баруды әдетке айналдырып алды. Ауылдың дәруменге бай құнарлы азық-түлік өнімдерін қолжетімді бағаға басқа жерден таба алмайтынын біледі өйткені.

Бұл жолы Өскеменге Катонқарағай ауданынан керуен келді, деп хабарлайды Altаynews.kz сайты.
Жай келген жоқ, сый-тартуын ала келіпті. «Туған ел – алтын бесігім» жобасы аясында эстафетаны қабылдап алған Катонқарағай ауданы азық-түлік өнімдерімен қоса 200 түп самырсын көшетін әкеліпті.

Ауыл шаруашылығы өнімдерінің жәрмеңкесін аймақ басшысы Ермек Көшербаев аралап көріп, еңбегінің жемісін елге ұсынып жатқан шаруалармен тілдесті. Базарда өзге аудандарды қойып, еліміздің өзге өңірлерінде кездесе бермейтін, тек Катонқарағайдың брендіне айналған панты мен бал өнімдері келушілерге молынан ұсынылған екен. Алушылар қарасы да аз болмады. Көпшілікпен бірге облыс әкімі де ауылдың дәмінен сатып алып, отандық өндірушілердің еңбегін қолдады.

Катонқарағайлық өнерпаздардың концертін тамашалап, спорттық ойындардың қызығына түскен базаршы жұрт жәрмеңкеге жеңіл келіп, ауыр қайтып жатты. Әсіресе, Алтайдын балы мен пантысы, ет пен сүті өтімді болды. Жәрмеңкенің басты артықшылығы да сол ғой. Сатушы мен алушының арасында ешқандай делдал жүрмейді мұнда. Сондықтан баға да төмен. 
Болашақта бұл жақсы үрдісті жолға қойып, облыс орталығында азық-түлік белдеуін қалыптастыруды көздейтін ірі инвестициялық жобалар қолға алынған. Өскеменде салынып жатқан «Алтай» көтерме-тарату орталығы осы мақсаттағы жобалардың бірі. Бұл нысан іске қосылған соң өңірдің ауылшаруашылық өндірушілері өз өнімдерін осында әкеліп қоймаларда сақтай алады және ең бастысы тұтынушыларға делдалсыз сатады. Оның қызметі екі жаққа да тиімді. Бүгінде жергілікті шаруалар өз өнімдерін амалдың жоқтығынан қаладағы делдалдар мен алыпсатарларға өткізіп келсе, алдағы уақытта тұтынушыларға тікелей саудалауға мүмкіндік туады.
Онда фермерге қажетті барлық қызмет түрі, атап айтқанда құжаттарды ресімдеу, сараптама жүргізу және сатылатын өнімдерге сапа сертификатын беру қарастырылған. 
Мұндай ірі инвестициялық жобаны қолға алудағы негізгі мақсат – ішкі нарықты өзіміздің сапалы азық-түлік тауарларымен қолжетімді бағада қамтамасыз ету, инфляцияны тежеу. 
 «Алтай» көтерме-тарату орталығының жұмысы жергілікті билікке агроөнеркәсіп кешені өнімдерінің бағасын негізсіз көтеретіндермен күресуге, азық-түлік қауіпсіздігін қамтамасыз етуге мүмкіндік береді. Өйткені мұнда жергілікті өнімдермен қатар еліміздің оңтүстік өңірлерінен де тікелей жеткізілген азық-түлік тауарларын қабылдау көзделген.

Айта кетсек, кеше Катонқарағай ауданының мәдени күндері аясында "Ертіс концертте" гала-концерт пен көрме өткен болатын.