ҚР Ұлттық ұланының арнайы мақсаттағы бөлімшелері туралы  “Бүркіт” атты толықметражды көркем фильмі көрерменге жол тартты.  Отандық фильмді киносүйер қауыммен бірге Өскемен қаласындағы «Шығыс» өңірік қолбасшылығының  жеке құрамы да  тамашалады. Ұлттық ұлан туралы отандық “АЮ Синема” кинокомпаниясы түсірген үшінші әскери фильмнің қоюшы  режиссері – Қазақстан кинематографиясында “Алтыншы бекет” және “Қазбат” әскери кинокартиналарының бас продюсері ретінде танымал Данияр Ибрагимов. Аталмыш фильм — оның режиссерлік жұмысындағы дебюті.

Әскери сахналардың продюсерлік жұмысы арнайы күштердің ардагері, күрең берет иегері және жауынгерлік офицер Камал Жақсылықовқа жүктелген, деп хабарлайды Altaynews тілшісі.

Екінші продюсер – Ильяс Етекбаев, ал желілік продюсері —жауынгерлік іс-қимылдар ардагері Сабыржан Сулейменов. Басты рөлдерді танымал актерлер Санжар Мәди, Дәурен Серғазин және Асылхан Төлепов ойнайды. Фильмде сондай-ақ танымал әнші және музыкант Ғалымжан Молданазар бой көрсетеді. Антқа және қызметтік міндетке деген адалдықты мақсат тұтқан туынды әскерилердің көңілінен шыққандай.

Кинокартинаның түсіріліміне арнайы жасақ, әскери техника және авиация, сондай-ақ екі жүзден астам әскери қызметші қатысқан. Мәдени іс-шараға Шығыс өңірлік қолбасшылығының Семей, Павлодар қаласындағы әскери бөлімдері де атсалысты. Шым-шытырық оқиғаға толы фильм алғашқы минуттан-ақ қалың көрерменді баурап алғандай. Көрермен залында ине шаншар орын болмауы – туындының жоғары деңгейде түсірілгенін аңғартады. Осы орайда үлкен экранға енді шыққан фильмді тамашалап үлгерген Өскемен қаласының тұрғындары өз әсерімен бөлісті.

Еске салайық, Ұлттық ұланның арнайы мақсаттағы бөлімшелеріне арналған көркем фильм  Мемлекет басшысының әскер жасындағы және әскерге дейінгі жастармен жұмысты күшейту, оларды отансүйгіштік және Отанға қызмет ету рухында тәрбиелеу жөніндегі тапсырмаларын іске асырудың шеңберінде Мәдениет және ақпарат министрлігі Ұлттық киноны қолдау мемлекеттік орталығының тапсырмасы бойынша түсірілген.