2025 жылы Қазақстанға шетелден 6 843 адам, оның ішінде Шығыс Қазақстан облысына 774 адам көшіп келді. Барлық көшіп келушілердің 2234-і – қандас, ал қалғаны қоныс аударушылар санатына жатады, деп хабарлайды Altainews.kz тілшісі «Қазақпарат» агенттігіне сілтеме жасап.

Ведомство дерегінше, көшіп келушілерді қабылдауда солтүстік өңірлер алдыңғы орында тұр. Атап айтқанда, Павлодар облысына 2 190 адам, Солтүстік Қазақстан облысына 2 176 адам, Шығыс Қазақстан облысына 774 адам, Қостанай облысына 651 адам, Абай облысына 508 адам қоныс аударған. Сонымен қатар Ақмола облысына – 300, Атырау және Ұлытау облыстарына – 103-тен, Қарағанды облысына 38 адам келген.

Қандастар мен қоныс аударушылар негізінен Қытай, Өзбекстан, Моңғолия, Ресей және Түрікменстан елдерінен көшіп келген. Нақтырақ айтқанда, Қытайдан – 853, Өзбекстаннан – 720, Моңғолиядан – 459, Ресейден – 103, Түрікменстаннан – 64 адам, басқа елдерден 35 адам қоныс тепкен.

Министрліктің хабарлауынша, қабылданып жатқан мемлекеттік қолдау шараларының нәтижесінде қоныстану өңірлеріндегі көші-қонның теріс сальдосы 2019 жылмен салыстырғанда 36 пайызға төмендеген. Бұл шаралар қандастар мен қоныс аударушыларды әлеуметтік және тұрғын үймен қамту деңгейін жақсартуға бағытталған.