ШҚО-дағы пациенттерге емделу үшін Астанаға немесе Алматыға барудың қажеті жоқ
ШҚО-ға жұмыс сапарымен келген денсаулық сақтау вице-министрі Вячеслав Дудник өңірде медицина саласын дамытуға ерекше көңіл бөлінгенін атап өтті.
Вице-министр бірқатар медициналық мекемелерді аралап, ақ халаттылардың өтініштерін тыңдады, деп хабарлайды Altaynews.kz тілшісі.
- Шығыс Қазақстан облыстық ауруханасы бүкіл өңір тұрғындарына жоғары мамандандырылған медициналық көмек көрсетеді. Жыл сайын стационарда 10-11 мың пациент көмек алады. Диагностикалық орталыққа 250 мыңға жуық адам жүгінеді, - деді аурухананың бас дәрігері Буран Бүркітов.
Айта кету керек, онда жоғары технологиялық көмектің 111 түрі көрсетіледі.
- Біздің әлеуетіміз әлдеқайда жоғары деп айта аламын. Бізде білікті мамандар да, заманауи жабдықтар да жеткілікті. Үздік шетелдік клиникаларда біліктілікті арттыру курстарынан 30-ға жуық маман өтті. Сондықтан әлеуетіміз әлдеқайда жоғары деп айта аламын. Алайда барлық мәселе қаражатқа келіп тіреледі, - деп атап өтті бас дәрігер.
Вице-министр өз кезегінде, облыс әкімдігінің денсаулық сақтау жүйесін дамытуға жеткілікті көңіл бөлетінін айтты.
- Мұндағы пациенттерге емделу үшін Астанаға немесе Алматыға барудың қажеті жоқ. Себебі өңірдегі медициналық мекемелерде барлық жағдай жасалған. Заманауи жабдықтар мен шетелде білім алып келген дәрігерлер оған дәлел бола алады, - деді Вячеслав Дудник.
Оқи отырыңыз
