Зайсанда 300 орындық мектептің құрылысы басталды
Зайсан ауданында барлығы 27 мектепте оқушылар білім алып жатыр.
Биыл аудандағы бір мектеп заманауи жабдықтармен қамтамасыз етіліп отыр. Сондай-ақ жаңадан 75 орындық жекеменшік балабақша ашылып, 300 орындық мектептің құрылысы басталды, деп хабарлайды Altaynews.kz тілшісі.
«Қазақстан халқын қолдау» қорынан 250 млн теңге бөлініп, Зайсан ауданындағы Мұхтар Әуезов атындағы мектеп заманауй жабдықтармен қамтамасыз етілген. Ал Қарабұлақ ауылында 75 орындық жеке меншік бала бақша ашылған.
– Жалпы білім саласының 14 нысанында 211 млн теңгеге ағымдағы жөндеу жұмыстары жүргізіліп, Зайсан қаласында 300 орындық мектеп құрылысы басталды. Келесі жылы Жарсу мектебіне спорт корпусын салу жоспарланған, – деді Зайсан ауданының әкімі Аэлита Ахметсәлімқызы.
Айта кетейік, ел Президенті Қасым-Жомарт Тоқаев «Орта білімнің сапасы – табысты ұлт болудың тағы бір маңызды шарты. Әрбір оқушының білім алып, жан-жақты дамуы үшін қолайлы жағдай жасалуға тиіс. Сол үшін «Жайлы мектеп» ұлттық жобасы қолға алынды. Біз 2025 жылға дейін 800 мың баланың заманауи мектепте оқуына жағдай жасаймыз. Жалпы, мектеп салу үкімет және әкімдіктер үшін басты міндеттің бірі болуы керек», – деген болатын.
