Шығыс Қазақстан облысы бойынша Мемлекеттік кірістер департаменті мобильді аударымдарды бақылау заңсыз кәсіпкерлік қызметті көлеңкеден шығаруға бағытталғанын хабарлайды.

Мобильді аударымдарды бақылаудың негізгі өлшемшарты – бір жеке тұлғаның қатарынан күнтізбелік үш айдың әрқайсысында 100 және одан да көп әртүрлі тұлғалардан кәсіпкерлік қызметке арналмаған банк шотына ақша қаражатын алуы болып табылады (ҚР Қаржы министрінің 29.03.2022 жылғы №323 бұйрығына сәйкес).

2025 жылдан бастап банктер 2024 жылдың қорытындысы бойынша жеке кәсіпкерлер, заңды тұлғалардың басшылары және олардың жұбайлары туралы ақпарат ұсына бастайды.

Бұл шара жасырын кірістер мен тіркелмеген кәсіпкерлерді анықтауға бағытталған. Себебі көптеген кәсіпкерлер өз тауарлары, қызметтері мен жұмыстарын сатқаны үшін төлемдерді кәсіпкерлікке арналмаған жеке шоттарға мобильді аударым арқылы қабылдайды.

Сонымен қатар, қолданыстағы өлшемшарттарды қайта қарау жоспарлануда. Атап айтқанда, жеке кәсіпкер ретінде тіркелмеу құқығы бар тұлғаларға қатысты өзгерістер енгізіледі.