Жиырма жылдан астам уақыт бұрын Күршім ауданынан көшіп келген Қанат Қабдешовті қазір Поперечное ауылының тұрғындары ерекше құрметтейді. Біраз жыл шахтада еңбек еткен ол бертін «Қабдешов» шаруа қожалығын құрған. Жұбайы Анна екеуі төрт баланы дүниеге әкеліп, тәрбиелеп отыр.

Риддерде өткен ШҚО Қазақстан халқы Ассамблеясының XXIX сессиясына қатысқан Қанат Қабдешов жиналған көпшілікке өзінің отбасы, қолға алған кәсібі туралы айтып берді, деп хабарлайды Altaynews.kz тілшісі.

Қанаттың айтуына қарағанда, қожалықты 2020 жылы «Бастау бизнес» бағдарламасы арқылы алған грант қаражатына ашқан екен. Алғашында қала ортасындағы жер үйінде үш жылқы, екі сиырмен жеке шаруасын бастаған ол қазір Қамбар ата түлігінің санын 100-ге жеткізіпті. Оған қоса 30 бас ірі қара мен 70-тей ұсақ мал ұстап отыр. Іргедегі Риддер қаласына күнделікті сүт пен сүт өнімдерін әкеліп өткізеді екен.

– Біздің Риддерде ұлтаралық мәселе жоқ, – дейді ол. – Егер екі адам бір-бірімен келіспей қалса, жеке бастарына қатысты сұрақтар болуы мүмкін. Оны ұлтаралық қақтығыс деңгейіне шығару дұрыс емес. Менің ойымша махаббат пен достық ұлт таңдамайды. Көпұлтты еліміз үшін бұл қалыпты жағдай. Себебі, тілегіміз де, жүрегіміз де бір. Біз сияқты бақытты отбасылар көбейе берсін.