ШҚО кәсіподақтар орталығында жастар кеңесі құрылды
Кәсіподақтар федерациясы - жұмысшылардың, қызметшілердің мүддесін қорғауға арналған бірден-бір үлкен ұйым. Кәсіподақтар федерациясында еліміз бойынша 16 649 бастауыш ұйым бар. Оған екі миллионға жуық жұмысшы мүше. Оның ішінде отыз бес жасқа дейінгі жастардың үлесі бар болғаны 27 пайыз екен. Федерацияның бүгінгі міндеті - жастарды кәсіподақ қатарына тарту.
Оған орай Шығыс Қазақстан облысы кәсіподақтар орталығы жанынан кәсіодақтың жастар қанаты - «Келешек» жастар кеңесі құрылды. Оның төрағасы болып облыстық жастар ресурстық орталығының директоры Айдос Әділбеков бір ауыздан сайланды, деп хабарлайды Altaynews.kz тілшісі.
Бүгін облыстық кәсіподақтар орталығында өткен жиында өңірдегі «Казцинк», «KAZMINERALS Aktogay», «ҮМЗ», «Өскемен жылу-энергетикалық орталығы», «Эмиль» кәсіпорындарының өкілдері, жастар ресурстық орталықтарының жетекшілері бас қосты.
Темірбек Жұмағұлұлы алдағы уақытта «Келешек» жастар кеңесінің мүшелерімен еңбекшілердің ұжымдарына барып, кездесулер өткізетіндерін, жұмысшыларға мемлекет атынан, жұмыс берушілер тарапынан қандай әлеуметтік көмектер қарастырылғанын айтып, еңбек заңнамаларының орындалуын қадағалайтындарын жеткізді.
Қазір облыстық кәсіподақтар орталығы 2024-26 жылдарға арналған жаңа облыстық келісімшарт жасап, әлеуметтік әріптестерге жіберген. Жаңа жылдың басында жұмыс берушілердің ассоциациясы, облыстық әкімдік және кәсіподақ федерациясы арасында үшжақты меморандум бекітіледі. Темірбек Қасымжановтың айтуынша, ұжымдық еңбек шарттарында өңірлік үшжақты келісімшартта көрсетілген барлық әлеуметтік қолдаулар көрініс табуға тиіс.
«Келешек» жастар кеңесінің жұмысшы тобына «AMANAT» партиясының облыстық филиалының «Жастар рухы» жастар қанатының төрағасы Қорлан Туғанбаева, Өскемен қалалық жастар ресурстық орталығының директоры Бақытжан Ербол, «ҮМЗ» кәсіпорнының жастар орталығының жетекшісі Сергей Головкин және Өскемен жылу-энергетика орталығы жастарының өкілі Сырым Өмірзақов кірді.
Сонымен қатар жиында облыстық кәсіподақтар орталығының заң мәселелері және медиация бойынша бас маманы Батырбек Нұрпейісов ҚР Еңбек кодексінің негіздерімен таныстырып, жастардың сұрақтарына жауап берді.
