Тарбағатай ауданының шекаралық Жаңаауыл, Ахметбұлақ, Жаңаталап ауылдарында коворкинг орталықтары ашылды.

Қазіргі кезде мемлекет деңгейінде дәстүрлі кітапхана қызметіне өзгерістер енгізіліп жатыр. Яғни, кітапхана кітапты насихаттаумен ғана емес түрлі ақпараттық қызметті тегін көрсететін бірден-бір мекеме, сондай-ақ халық бос уақытын тиімді өткізетін әдеби, мәдени орталық ретінде жабдықталады, деп хабарлайды Altaynews.kz тілшісі.

Аталған ауылдарда ашылып отырған коворкинг орталықтары -  соның бір көрінісі. Кез келген адам мұнда  интернет желісін тегін пайдаланып, өз қалауынша жұмыс істей алады. Түрлі тренингтер өткізуге, бірігіп түрлі бастамаларға дайындық жұмыстарын жүргізуге болады. Ең тиімдісі, ешкім ол үшін ақы сұрамайды, кедергі келтірмейді. Ауылдағы үлкен-кішінің  бәріне ортақ,  жанына жайлы демалыс орыны. Жастар дойбы, шахмат, домино, тоғызқұмалақ, т.б. ойындарды ойнайды. Кейде жиналып келіп, тоқыма тоқып, әнгімелесіп отырған әжелерді де көруге болады.

Бұл орталық жастарға өзін-өзі жетілдіру үшін үлкен мүмкіндіктер беретіні сөзсіз.

Осы уақытқа дейін кітапхана әдебиет пен ақпарат орталығы болса, енді қосымша демалыс орыны ретінде ауылдың тыныс-тіршілігіне өзіндік үлесін қосатын, өркениет көшіне ілескен заманауи руханият ордасына айналып отыр.