- Көз ілеспес жылдамдықпен дамып келе жатқан цифрлы технологиялар БАҚ саласын да айналып өтпей, өз әсерін тигізуде. Бірақ егер сіз газет-журналдардың күні бітті, өміршеңдігі жоқ десеңіз, қатты қателесесіз. Дамыған елдердің өзінде мерзімді басылымдар өзіндік бағыттарын айқындап, ойлы оқырманға жол тартып жатыр. Осындағы "ойлы" сөзін тектен-текке айтпадық. Себебі жарқ-жұрқ еткен ғаламтордағы ақпараттың рас-өтірігі қайсы екенін айыра алмай, ақылын айран, ойын ойран қылғанша, газеттегі нақты, шынайы мағлұматтарды оқып, сол оқығанын сана сарабына салатын адам ойлы болмай, қандай болмақ?! Әр мәселенің байыбына барып, тереңіне үңіліп жазылған сараптамаларды да әлеуметтік желілерден шам алып іздесеңіз де таба алмайсыз. Басылымдардың басынан бағы тайды дегенмен келіспейтініміз, міне, осыдан.
 
Бүгінгі ұлттық баспасөз күні барша әріптесіме құтты болсын деймін! Халықтың газетке деген құрметін арттыру, сенімін күшейту біздің қолымызда. Сол жолда тұлпарымыз оза шапсын! Қалам атты қаруымыз қолдан түспей, сөз сұңқарын самғата берейік!