Биыл елімізде тұңғыш рет өңірлік кадрлық резервтерге іріктеу басталады.

Конкурсқа 1-наурыздан бастап еліміздің барлық өңірлерінде, республикалық маңызы бар қалаларда және Астанада 35 жастан аспаған, жоғары білімді жəне үш жылдан кем емес еңбек өтілі бар Қазақстан Республикасының азаматтары қатыса алады, деп хабарлайды Altainews.kz тілшісі.

Бұл туралы  ҚР Мемлекеттік қызмет істері агенттігі ШҚО бойынша департаментінің басшысы Нұрлан Еркебаев өңірлік коммуникациялар қызметінде өткен брифингте мәлімдеді.

Департамент басшысының түсіндіруінше, іріктеу бес кезеңнен тұрады. Бірінші кезеңде 1-30 наурыз аралығында құжаттарды қабылдайды, екінші кезең - заңнаманы білуге және үміткердің жеке қасиеттерін бағалауға тестілеу, үшінші кезең - құзыретті бағалау, төртінші кезең - комиссиядағы құрылымдық сұхбатқа он бес үміткер ғана жіберіледі. Бесінші кезең - комиссияның отырысында резервке кандидаттарды қабылдау туралы ұсыныс шығарылады. Өңірлік резервтерге алынған адамдардың тізімі комиссия шешім қабылдағаннан кейін бір жұмыс күні ішінде интернет-ресурстарда, сондай-ақ онлайн-платформада жарияланатын болады.