ШҚО-да «Анама хат - Письмо маме» онлайн байқауы басталды.

Отбасылық құндылықтарды насихаттай отырып, ата-аналардың балаларымен дұрыс қарым-қатынасын нығайтуға бағытталған игілікті шара 20 ақпан - 4 наурызға аралығында өтеді, деп хабарлайды Altainews.kz тілшісі.

Байқауға әлеуметтік  желіде белсенді кез келген облыс тұрғыны қатыса алады. 

Конкурсқа қатысушылар 28 ақпанға дейін әлеуметтік желілерде #Анама хат – Письмо маме хэштегімен хаттарды жариялайды. 

Қалалар мен аудандар әкімдіктері 2024 жылғы 29 ақпанда хаттардың іріктеу турын өткізеді. Онда хаттың шынайылығы, тақырыптың ашылуы, көркемділігі және ерекшелігі бағаланады. Ал 1 наурызда әрбір қала-аудан әкімдігі байқаудың облыстық турына қатысу үшін қоғамдық даму басқармасына 2 үздік жұмысты жолдайды.

Облыстық әйелдер істері және отбасылық-демографиялық саясат жөніндегі комиссияның мүшелері 2 наурызда мемлекеттік тілдегі және орыс тіліндегі екі үздік хатты анықтайды. 

Үздік деп танылған екі хат 6-7 наурыз аралығында Өскемен қаласында өтетін 8 наурыз - Халықаралық әйелдер күніне арналған салтанатты жиында оқылып, «Анама хат – Письмо маме» байқауының жеңімпазы атанған хат авторлары мен аналарына құрмет көрсетіліп, арнайы сыйлықтармен  марапатталады. 

Айжанат Бақытқызы