Елдің ертеңі, ұлттың болашағы жастардың қолында. Сондықтан да қай уақытта болмасын жастардың әрбір істе белсенді болуы маңызды. Игілікті істің қасынан табылып, бастамашы болар жастар жоқ емес, баршылық. Соның бір дәлелі - күні кеше белсенді жастар облыс орталығында «Жастар Fest» жиынын өткізіп, әртүрлі тақырыпты талқыға салды.

Шығыс Қазақстан облыстық балалар және жасөспірімдер кітапханасында Наурыз мейрамы қарсаңында еркін форматта өткен «Жастар fest» шарасына белсенді жастар қатысып, әртүрлі тақырыпта баяндама қойды. Сондай-ақ қатысушылар «Асық ату», «Ақшамшық», «Ләңгі» қатарлы ұлттық ойындарды ойнап, кейінгі буын жастарға үлгі көрсетті, деп хабарлайды Altainews.kz тілшісі.

Баяндамашылар «Менің қосқан нақты үлесім», «Елім гүлденуі үшін не істей аламын?», «Жайдарлы жастар» және тағы да басқа тақырыптар төңірегінде ой өрбітіп, сұрақтарға жауап берді.

Шараға «Жастар ресурстық орталығының», «Obtain.Academy» тілдер орталығының жастары және С.Аманжолов атындағы Шығыс Қазақстан университетінің студенттері қатысты.

Фото: ШҚО балалар және жасөспірімдер кітапханасы