8 сәуір, яғни кеше елімізде «Таза Қазақстан» экологиялық акциясы бастау алды. Науқан бес аптаға созылады. Бұл жолғы акцияның ерекшелігі - әр аптаның өзіндік атауы мен нақты мақсаты бар.

Бұл туралы ШҚО энергетика және ТҮКШ басқармасының басшысы Нұрлан Рамазанов айтып берді, деп хабарлайды Altainews.kz тілшісі.

Аталмыш акцияға еліміздің әрбір өңірі қосылып жатыр. Науқанның алғашқы күнінен 13 сəуірге дейін созылатын бірінші апта «Таза өлке» деп аталады. Яғни, бір апта ішінде тұрғындар, қоғам белсенділері, ұйымдар мен кəсіпорындардың қызметкерлері іргелес аумақтар мен белгіленген аулаларды қоқыстан тазартуы керек.

Осылайша акция 82 мың тұрғын үй ауласы мен 89 мың жеке үй ауласын қамтымақ.

15-20 сəуірге дейін жалғасатын екінші аптаға «Киелі мекен» деп атауы берілді. Бұл күндері тарихи-мəдени ескерткіштер аумағын абаттандыру жұмыстары жүргізіледі.

«Жасыл аймақ» деп аталған үшінші апта 27 сәуірге дейін жалғасатын болады. Бұл апталықта көшеттер отырғызылады жəне ағаштар əктеледі.

29 сәуір мен 4 мамыр аралығында өтетін төртінші аптаға «Өнегелі ұрпақ» деп тақырып қойылған. Яғни ардагерлер мен қарттардың аулаларына тазалық жүргізіліп, оларды абаттандыруға көмек беріледі.

«Мөлдір бұлақ» атауы берілген соңғы, бесінші аптада су айдындары – өзендер мен көлдердің айналасы қоқыстан тазартылады.