Ұлан ауданындағы Шалқар және Дұбығалы көлдерінің маңы қоқыстан тазартылды
«Таза Қазақстан» экологиялық акциясы «Мөлдір бұлақ» апталығы аясында Ұлан ауданының Шалқар көлінде және Тайынты ауылы аумағындағы Дұбағалы көлінің жағасында тазалық жұмыстары жүргізілді, деп хабарлайды Altainews.kz тілшісі.
Ұлан ауданы әкімдігі ақпаратына сүйенсек, осы күнге дейін жалпы аудан бойынша бес су қоймасы тазаланып, 15 мың тонна қоқыс шығарылды. Науқанға қатысқан 500 адам аймаққа 200 түп сәндік ағаш көшеттерін отырғызып, аумақты толықтай қоқыстан тазартты.
- Адам – табиғаттың төл перзенті. Халқымыз көктем келісімен ауласын тазалап, үйінің айналасына гүл, жасыл желектер егіп, су ағатын арық, арналардың көзін ашқан. Мен де бұл шараға қолдау көрсетіп, өз үлесімді қостым, - деді қоғам белсендісі, Бозанбай ауылының тұрғыны Жұмабек Қаирбердіұлы.
Акцияға студент жастар, мектеп оқушылары, жастар ұйымдарының мүшелері, эко-белсенділер, еріктілер белсенділер, мемлекеттік қызметкерлер атсалысты.
- Бұл шараға еңкейген қариядан бастап, жастарға дейін ерекше ынта танытуда. Мен табиғатымыз әрдайым таза, әдемі, көрікті болғанын қалаймын. Сондықтан да барлық жастарды отансүйгіштікке, туған жерге және қоршаған ортаға деген жанашырлық пен құрмет құндылықтарын дәріптеуге шақырамын, - дейді белсенді жастардың бірі Мадина Бірлікқыз.
Сібе көлдерінің жағалауында өз ісін дөңгелетіп отырған кәсіпкер Мадина Болатқызы акцияға қатысушыларды ыстық тағаммен қамтамасыз етті.
- Осындай акция аясында көлдің жағалауларын тазалауға келген қатысушыларға мен өте қуаныштымын. «Жұмыла көтерген жүк жеңіл» дегендей, бірігіп істеген іс нәтижесін беріп, көл маңайы тазарып қалды, - дейді Мадина Болатқызы.
Оқи отырыңыз
