Шығыс Қазақстан облыстық ауруханасының дәрігерлері жүрек аритмиясын заманауи әдіс арқылы емдей бастады, деп хабарлайды Altainews.kz тілшісі.

Облыстық ауруханада аритмияны радиожиілікті абляция арқылы емдеу бойынша шеберлік сабағы өтті. Бұл ретте аритмияны тудыратын жүрек аймақтарына жоғары жиілікті токпен әсер етіледі. Нәтижесінде, аритмия ошағы бітеліп, жүрек қағысы қалыпқа келуге тиіс. Ота тамыр немесе артерия арқылы жүрекке енгізілетін катетермен жасалады.

Екікүндік шеберлік сабағын Президент іс басқармасы ауруханасының аритмолог-дәрігері Ринат Қамиев өткізді.

Радиожиілікті абляция ШҚ облыстық ауруханасында алғаш рет өткізіліп тұрған жоқ, бірақ ол тек шеберлік сабақтары барысында жасалатын. Бұл емді қажет ететін науқастардың барлығы дерлік елордалық клиникаларға жіберілетін.