Алматыдағы №7 қалалық клиникалық ауруханасының аритмологтары жүрек қағысы бұзылған науқастарды емдеудің бірегей әдісін қолданысқа енгізді.

Емдеу мекемесінің баспасөз қызметі мәлім еткендей, дәрігерлер жүрек қағысы бұзылған науқастарға кардиомонитор орнатуды қолға алды, деп хабарлайды Altaynews Қазақпарат агенттігіне сілтеме жасап.

Жаңа әдісті аурухананың интервенциондық кардиохирургия және аритмология бөлімшесінде аритмолог Қанат Ергешев қолданысқа енгізді.

Жүректің түрлі ақауларын анықтайтын диагностикалық аппарат алғаш рет 21 жастағы пациентке орнатылды.

Жас жігіт №7 ауруханаға бас айналу, бас ауруы, әлсіздік, есінен тану сынды белгілермен түскен.

Дәрігердің айтуынша, кардиомонитор терінің астына орнатылады. Көлемі кішігірім флэш-картадан аспайтын аппарат аурудың жүрек қағысын ұзақ уақыт бойы ЭКГ-мониторинг жасауға мүмкіндік береді.

Имплантты орнату 15 минут қана уақыт алады, операция жергілікті жансыздандыру арқылы жасалады және науқас ауруханада жатпайды. Аппарат жүректің электр импульстарын жазып отырады, аритмолог маман арнайы бағдарлама арқылы жүрек талмасы ұстаған кезде, адам есінен танған сәтте жүрек қағысы қалай басталғанын біліп отырады.

Айтуынша,аталған қондырғы жас жігіттердің, мысалы, спортшылардың кенеттен өліміне себепкер болып жататын жасырын жүрек дерттерін анықтауға көмектеседі.

Айта кетейік, жоспарлы емнің барлық түрлері, соның ішінде аталған процедура МӘМС арқылы қаржыландырылады.