Өскемендегі №11 мектеп-лицейдің аумағында 6-8 сынып оқушылары арасында Жол қозғалысы жас инспекторларының облыстық слеті өтті, деп хабарлайды Altainews.kz тілшісі.  

Шығыс Қазақстан ғылыми-әдістемелік «Дарын» орталығы мен ШҚО ПД Жергілікті полиция қызметі ұйымдастырған байқауға облыс мектептерінен келген 8 команда қатысып, жеті кезең бойынша бақ сынады. Сайыс саптық байқау, жол жүру ережесінің білгірі, велосипед тебу, жас реттеуші, жас санитар, үгіт-насихат бригадаларының жарысы, білгірлер сайысы кезеңдерінен тұрды.

Байқауды ұйымдастырушы Қуаныш Сағынжанұлының айтуынша, слет бірнеше жыл бойы Халық қаһарманы Ғазиз Байтасовтың құрметіне арналып келеді.

Сайыс қорытындысы бойынша 1 орынға Өскемен қаласының А. Байтұрсынов атындағы №20 орта мектебі, 2 орынға Риддер қаласының «Шанырақ» мектеп-гимназиясы, 3 орынға Алтай қаласының мектеп-лицейі ие болды.

Барлық қатысушылар медальдармен, сыйлықтармен, жеңімпаз топтар кубоктармен, дипломдармен марапатталды. 

Ақмарал Мұхтарбекова, студент

Фото: ШҚО ПД