Алдағы жылыту маусымына Риддер ЖЭО-ның іске қосу қазандықтары дайын болады
Риддер ЖЭО-да жөндеу жұмыстары жалғасып жатыр, соның нәтижесінде қазандықтардың тозуын 17,3 пайызға дейін, ал жылу желілерінг 24,1 пайызға дейін төмендетуге мүмкіндік туады, деп хабарлайды Altainews.kz.
Бүгін Қазақстан Республикасының Премьер-Министрі Олжас Бектенов жұмыс сапарымен Шығыс Қазақстан облысында болды. Сапар барысында ол Риддер ЖЭО-ның жөндеу жұмысымен танысты.
Жылу орталығында қазір алты қазандықтың агрегатын, қосалқы жабдықтарды және жылыту бетін, экономайзерлерді, су жылытқыштарды жаңарту жұмыстары жүргізілуде. Қазір мұнда барлығы 17 мекеменің 540-қа жуық адамы жұмылдырылған.
Премьер-Министр Олжас Бектенов атқарылып жатқан жұмыс барысын қатаң бақылау қажеттігін атап өтті, өйткені ЖЭО-ның кідіріссіз жұмыс істеп тұруы өте маңызды.
Сонымен қатар тұрғындар да жылыту маусымына қазірден бастап дайындалуы қажет. Пәтерлерін жылылап, жылу құбырларын тазартып ретке келтіріп қойғаны абзал. Бұл тұрғын үйлердегі жылу шығынын азайтады.
Айта кетейік, былтырдан бері Шығыс Қазақстанда облыс әкімінің орынбасары бастаған арнайы комиссия жұмыс істеуде. Комиссия өкілдері жөндеу жұмыстары кезінде бұзушылықтарға байланысты барлық мәселелерді қадағалайды.
Қазір станцияны Өскемен жылу желілерінің теңгеріміне беру бойынша жұмыстар жүріп жатыр. Бұл қажет болған жағдайда мамандарды тартуға мүмкіндік береді.
Айта кетейік, жылу көзіндегі жұмыстар басталғаннан бері 100-ге жуық бейінді маман жұмысқа оралды.
Татьяна Кравченко
Фото: primeminister.kz