«Востоквзрывпром» ЖШС жүргізушілері соңғы 40 күн бойы жалақы ала алмай отырғандарын жеткізді.  Мәселенің мән-жайы мен тараптардың дәйегін  Altainews.kz тілшісі тыңдап қайтты.

Компания басшылығы жалақы төленбеу себебі жүргізушілердің дизель отынын ұрлады деген күдікке байланысты деп отыр. Алайда, бұл айыптауды жүргізушілер жоққа шығаруда. Тығырыққа тірелген тараптар теңдей заңға жүгінуде. 
"Даудың дәнегі неде екенін тек тиісті органдар ғана айқындап береді" деген ШҚО мемлекеттік еңбек инспекциясы басқармасының басшысы Бақытбек Қизатов жүргізушілердің шағымы бойынша тексеру жүргізілгенін айтты. 

Еңбек инспекторлары тарапынан жұмысшылар мен жұмыс берушілердің құқықтары мен міндеттері түсіндірілді. Өз кезегінде «Промстройбезопасность» ЖШС директоры Константин Антропов  күн соңына дейін жалақыны толық төлеуге уәде берді. 

Бұл жағдайдан соң еңбек инспекциясы мен компания арасындағы келісім бойынша жүргізушілерге жалақы төленеді деп күтілуде, ал дизель шығыны мен көліктердің пайдалану мәселесі құқық қорғау органдары анықтайтын болады.

Төлеуғазы Жансая