Шығыс Қазақстан облыстық тарихи-өлкетану музейінде өңірдің жануарлар әлемін зерттеу және насихаттау мақсатында «Табиғат келбеттері» атты сурет көрмесі ашылды, деп хабарлайды  Altainews.kz тілшісі.

Иллюстрациялаушы, анималист-суретші, бүкілресейлік аймақтық көрмелердің қатысушысы және жеке көрмелердің авторы Елена Уткинаның туындылары негізінен сурет салуға қызығатын оқушыларға, студенттерге, сондай-ақ сурет өнерін бағалайтын қала тұрғындары мен қонақтарына арналған.

Экспозицияда Шығыс Қазақстанда кездесетін жануарлардың – кішкентай кеміргіштерден бастап ірі шөпқоректілер мен жыртқыштардың сыртқы бейнесі, әдеттері мен мінез-құлықтары көрсетілген бірнеше ондаған графикалық және кескіндемелік жұмыстар ұсынылды. Көрмеде суретшінің шығармашылық әдістемесіне, суреттер салу барысындағы эскиздеріне және аяқталған картиналарына ерекше назар аударылған.

Сонымен қатар, келушілер өңірде мекендейтін тиіннің, боршатышқанның, түлкінің және Қызыл кітапқа енгізілген құстардың графикалық эскиздерін тамашалай алады.

Көрме қала тұрғындары мен қонақтары үшін 1 ай көлемінде ашық болады.

Ақерке Рағызбаева
Фото: Аяужан Утеулинова
Видео: Жәнібек Ырысбай