Өскемендіктер ерекше көрмені тамашалады
Өскемендегі Шығыс Қазақстан Өнер музейінде «Әлем суретшінің көзімен» атты шемонаихалық суретшілердің ұжымдық көрмесі ашылды, деп хабарлайды Altainews.kz тілшісі.
Көрмеде Вадим Салманханов өзінің монохромды, философиялық және авангардтық графикасын көпшілік назарына ұсынса, Юрий Шушаков керісінше жарқын, шынайы пейзаждарына басымдық беріпті. Екеуінің алпыстан астам туындысы музейдің кең залына үйлесімді қойылған екен.
Бұған дейін Вадимнің жеке көрмесі Шемонаиханың өзіне және Өскеменде өткен, оған қоса Ресейдің Новосібір қаласында да ұйымдастырылған. Қылқалам шеберінің қолынан шыққан суреттер - заманауи өнер туындысының айқын бейнесі.
Сондай-ақ Юрий Шушаков та әр жылдары жеке көрмесін өткізіп келеді. Шемонаиха тарихи-өлкетану музейінде оның алты жеке көрмесі ұйымдастырылған.
Көрменің ашылуына Өнер музейінің директоры Ерназ Қалижанов, Шемонаиха тарихи-өлкетану музейінің директоры Наталья Дубинчик және басқа да сурет өнерінің өкілдері, оқушылар мен студенттер қатысты.
«Әлем суретшінің көзімен» көрмесі 4 маусымнан 14 шілдеге дейін жалғасатын болады.
Шұғыла Манафья,
студент