Шығыс Қазақстан облысында бюджет қаражатын тиімді пайдалануға, шығыстарды шектеуге және қатаң бақылауға бағытталған бірқатар пәрменді шаралар қабылдануда, деп хабарлайды Altainews.kz тілшісі.

ШҚО Экономика және бюджеттік жоспарлау басқармасының мәліметінше, өңір экономикасының өсуін қамтамасыз ету мақсатында 2024-2026 жылдарға арналған салық және бюджетке төленетін төлемдер бойынша резервтерді анықтау алгоритмі әзірленген. Аталмыш алгоритммен жеке табыс, әлеуметтік, жер және басқа да салықтар түсімдерінің ұлғаюы есебінен салық салынатын базаның өсуі көзделіп отыр.
Сонымен қатар, басқа өңірлерде есепте тұрса да ШҚО-да қызметін жүзеге асыратын кәсіпкерлердің тізімі қалыптастырылмақ. Салықтардың жергілікті бюджетке түсуін есепке алу үшін салық төлеушілердің дерекқоры дайындалуда.

Ағымдағы жылдың 9 айының қорытындысы бойынша облыс бюджетіне қосымша 3,7 млрд. теңге өндірілді. Олар өңірдің әлеуметтік-экономикалық дамуының өзекті мәселелерін шешуге, сондай-ақ ірі бюджеттік жобаларды бірлесіп қаржыландыруға бағытталған.

Айта кету керек, бұл жұмыстың қорытындылары қалалар мен аудандар әкімдерінің, облыстық мекемелер басшыларының қатысуымен өтетін кеңестерде егжей-тегжейлі қаралады.

Кассалық операцияларды талдау нәтижелері бойынша бюджет қаражатын тиімсіз, уақтылы пайдаланбау тәуекелдері туындаған жағдайда оларды одан әрі пайдалану процесін реттеу жөніндегі ұсыныстар бюджет заңнамасы шеңберінде қаралатын болады.

ШҚО әкімінің бірінші орынбасары бюджет қаражатындағы қателіктер үшін кінәлі басшыларға ең қатаң шаралар қолданылатынын жоққа шығармайды.