Жуықта Румыния астанасы Бухарест қаласында өткен жасөспірімдер арасындағы XXI Халықаралық жаратылыстану-ғылыми олимпиадасында (IJSO) өскемендік Айзере Жеңісханова Қазақстан құрамасының намысын қорғап, күміс жүлдеге ие болды, – деп хабарлайды Altainews.kz тілшісі.

Бұл олимпиадаға әлемнің түкпір-түкпірінен келген оқушылар қатысып, химия, биология және физика пәндері бойынша білімдерін ортаға салды. Айзере өзінің терең білімі мен табандылығының арқасында теориялық және практикалық кезеңдерде үздіктер қатарынан көрініп, жоғары нәтиже көрсетті.

Айзеренің осындай биікке көтерілуіне оның ұстаздары мен ата-анасының үлесі зор. Назарбаев Зияткерлік мектебінің мұғалімі Жанар Әбішева шәкіртінің ерекше қабілетін байқап, оны олимпиадаға жүйелі түрде дайындап, аз ғана уақыт ішінде нәтижеге жеткізді. Осы уақыт аралығында Айзере екі бірдей халықаралық олимпиададан алтын және күміс жүлделер алып, республикалық деңгейде де үздік нәтижелер көрсетті.

Айзеренің ата-анасы – Бақытжан мен Шынар Мейрамхановтар қызына бала күнінен қолдау көрсетіп, математикаға, кейіннен химия мен физикаға қызығушылығын арттыруға жағдай жасаған.

Айзере туралы қызықты деректер:

• 2023 жылы халықаралық «Туймаада» олимпиадасында 1-орын иеленді.
• Республикалық «Кіші лига» олимпиадасында физикалық және бейорганикалық химия бағытында жеңімпаз атанды.
• Бүгінде дарынды оқушы жас жеткіншектерді олимпиадаларға дайындап, оларға қолдау көрсетуде.