Шығыс Қазақстан облысында тұрғын үй мәселесін шешу бағытында 2024 жылы айтарлықтай нәтижелерге қол жеткізілді. Жыл қорытындысы бойынша облыста 400 мың шаршы метрден астам тұрғын үй пайдалануға берілді, бұл көрсеткіш өткен жылмен салыстырғанда 113%-дан астам өсу көрсетеді. Оның ішінде 265 мың шаршы метр аумақты қамтитын 31 көпқабатты үй салынды. Бұл үйлердің кейбірі несиеге берілетін тұрғын үй ретінде, қалғаны коммерциялық секторда тұрғызылды.

Шығыс Қазақстан облысында халықты баспанамен қамтамасыз ету мақсатында жүзеге асырылып жатқан «Бір қабатты Шығыс» бағдарламасы ауылдық аймақтардың дамуына серпін беруде. Бағдарлама 2020 жылы іске қосылып, жеке серіктестерден тұрғын үйлерді сатып алу және оларды мұқтаж азаматтарға үлестіру арқылы жүзеге асырылуда.  

Облыстық құрылыс, сәулет және қала басқармасының мәліметі бойынша, «Бір қабатты Шығыс» бағдарламасы аясында 30 мың шаршы метр тұрғын үй салынған. Сонымен қатар, халықтың қаражаты есебінен 106 мың шаршы метрден астам жеке тұрғын үй құрылысы жүргізілді. Әлеуметтік осал топтарға арналған жалдамалы тұрғын үйлерді сатып алуға шамамен 15,6 млрд теңге бөлініп, бұл қаражатпен 750 пәтер сатып алынды. 

Мемлекет көпбалалы отбасыларды баспанамен қамтамасыз етуге ерекше мән беруде. Бұл санаттағы отбасыларға түрлі жеңілдіктер мен арнайы бағдарламалар ұсынылып келеді. 2024 жылы көпбалалы аналарға арналған 232 пәтер сатып алынып, пайдалануға берілді,  ал әлеуметтік осал топтарға 518 пәтер ұсынылды.

«Бір қабатты Шығыс» бағдарламасы аясында Өскемен қаласында 31 үй және басқа аудандарда 391 үй салынды, олардың жалпы ауданы 30 мың шаршы метрден асады. Бұл үйлердің құрылысы ауылдық аймақтардың әлеуметтік-экономикалық дамуына оң ықпал етіп, тұрғындардың өмір сүру сапасын арттыруға бағытталған.

2025 жылға жоспар бойынша 12 мың шаршы метрді құрайтын 180 пәтер салу және сатып алу жоспарланып отыр. Осы мақсатқа республикалық бюджеттен 2,7 млрд теңге бөлінеді. Бұл шаралар өңірдегі тұрғын үй қорының дамуын қамтамасыз етіп, мұқтаж азаматтарды қолдауға мүмкіндік береді.

Аталған бағдарлама аясында салынған үйлер заманауи стандарттарға сәйкес сапалы құрылыс материалдарымен жабдықталып, тұрғындарға қолайлы жағдай жасауда. Жаңа үйлердің бой көтеруі ауыл тұрғындары үшін қосымша жұмыс орындарының ашылуына да ықпал етті.